నవ్వుల జల్లు - జయదేవ్

	వంగ వర్మ: పాపి చిరాయువంటారు గదా? చెంగ శర్మ: పాప పుణ్య ప్రస్తావన ఇప్పుడెందుకూ? వంగ వర్మ: నీకు తొంభై ఐదేళ్ళు నిండాయి గదా... అందుకనడిగా!!

కవిపుంగవుడు: మహారాజా, నీవు ధీరుడివి, వీరుడివి, బలశాలివి, అజేయుడివి.... మహారాణి: (కొర కొర చూస్తూ, రాజుగారి చెవి వైపు వంగి) మహారాజా, ఇలాంటి అబద్ధాలు పలికే కవులని పోషించకండి, ఈ కవి నాకు జుగుప్స కలిగిస్తున్నాడు.

	కిన్నెరుడు: ఆకాశం లోని తారలేమయ్యాయి? ఒక్కటీ కనిపించడం లేదే? కింపురుషుడు: ఈ రోజు చంద్రుడి గారింట్లో పూజ! పురోహితులు నక్షత్ర హారతి జరిపిస్తున్నారు.

సూరప్ప రెడ్డి: 'ఏడు కొండల సామి.. ఎక్కడున్నావయ్యా' అంటూ ఘంటసాల వారు పాడుతున్నారే? వీరప్ప నాయుడు: దళారులు ఆయన్ని మోసగించి వుంటారు... దేవుడితో మొర పెట్టుకుంటున్నారు పాపం!!!

	సంగకారి: సీత మహాసాధ్వి అని తెలిసీ, ఆమెను అగ్నిప్రవేశం చేయించారే రాముల వారు? డిస్య నాయక: అది వాళ్ళూరు ఆచారం! సంగకారి: సరే గాని, నన్ను మా ఇంట్లో దిగబెట్టు ప్రియతమా, మా ఆయనొచ్చే వేళయింది!!

కాశి బడి గురువు: గంగను భగీరథుడు భూమికెందుకు తెచ్చాడు? కాశి బడి విద్యార్థి: కలుషితం చెయ్యడానికి, గురువు గారూ!!

	యమలోకంలో, పాపి నంబర్ 314: గురూ... నీకో శుభవార్త. ఈరోజు పవర్ కట్! కరెంట్ షాక్ శిక్ష రద్దు చేసారు!! పాపి నంబర్ 318: యమలోకంలో జనరేటర్లు లేవా? పాపి నంబర్ 314: ఉన్నాయ్ గానీ, వాటిని నడిపే డీజిల్ని చుక్క మిగల్చకుండా, మందు గొట్టేశారు, యమ కింకర్లు!!

తానా శర్మ: దుర్యోధన చక్రవర్తి, మాటి మాటికి, పాండవుల్ని పాతేస్తాను, దున్నేస్తాను, పొడి చేస్తాను అంటారే? తందానా శాస్త్రి: దుర్యోధనులు, బలరాముల వారి శిష్యుడు గదా! బలరాముల వారి ఆయుధం నాగలి కదా!! అక్కడ్నుంచి వచ్చాయి, ఆ మాటలు!!!

	పార్వతి: కేదరనాథ్ లో వరదల వల్ల అంత మంది మరణించారే? పరమేశ్వరుడు: వారందరికీ కైవల్యం సిద్ధించిదిలే! పార్వతి: బాగానే వుంది కానీ, వరదలు తగ్గగానే మళ్ళీ వర్షం కురిపించారే? పరమేశ్వరుడు: వరద బాధితులకు తగిన సహాయ చర్యలందక, అక్కడి భక్తులు, తిండి నీరు లేక తల్లడిల్లి పోతుంటే , కనీసం వాళ్లకి తాగునీరైనా అందించడానికి వర్షం కురిపించానంతే!!

దుకుటాసురుడు: ఇది వాస్తు దోషాల పుట్ట! ఇదేమి పెళ్లి విడిదండీ బాబూ?? నాసికాసురుడు: ఇది ఘటోత్కచులవారు, కౌరవులకోసం నిర్మించిన పెళ్లి విడిది!! కౌరవులు తన్నులు తినబోతున్నారు.. చూస్తూ వుండు!!!