నవ్వుల జల్లు - జయదేవ్

	దానయ్య : అంత సంపాదించి, చివరికి ఏమీ మిగల్చకుండా వెళ్ళిపోయాడే, బంగారు శెట్టి? శీనయ్య : వెళ్ళేప్పుడు ఏమీ తీసుకెళ్ళడానికి కుదర్దుగా? అందుకని పోయేముందు అంతా దర్జాగా ఖర్చుపెట్టేశాడు!!!

సుబ్బిశెట్టి : కవి శేఖరా, మీరు కవిత పాడితే, నల్లేరు మీద బండి నడకే నటగా? కవిశేఖరుడు: ఔను! సందేహమేల? సుబ్బిశెట్టి : మన బండి ముందుకు సాగడంలేదు. మీ కవితా గానం మొదలెట్టండి, బండి నడుస్తుందేమో చూద్దాం!! కవిశేఖరుడు : నీతో బండి కట్టించుకుని పెద్ద తప్పు చేశాను!!!

	యువరాజు : ప్రియా, నీ అధర రసము పుల్లగా నున్నదే? యువరాణి : చింతకాయలు తిన్నాను! నేను నెల తప్పాను, నాధా! (సిగ్గుతో)!

ఆస్తికయ్య : 108 ప్రదక్షిణాలు చేస్తావు! ఏం ప్రయోజనం? నాస్తికయ్య : అలా చెయడం వల్ల ఆరోగ్యానికి మంచిది! ఆస్తికయ్య : ఆ గుడిచుట్టూ గాక, ఆ మైదానంలో తిరిగినా, అదే ప్రయోజనం కదా? నాస్తికయ్య : గుడిలో ప్రసాదం దొరుకుతుంది!!

	మాదా కదళం: ఈ రోజు మీ ఇంట్లో గుత్తి వంకాయ కూర! నువ్వే వండావు!! ఔనా?? మరదలు : నీ కెట్లా తెలుసు? మాదా కదళం: అల్లుడుగారు వొచ్చారుగా? మరదలు : అదెట్లా తెలుసు? మదా కదళం : పొద్దున్న బజార్లో వంకాయలు కొంటున్న అమ్మగార్ని చూశాలేమ్మా!!

ఎలుక రాజు : 'భక్తి' గురించి తెలుసుకోవాలనుంది. ఎవర్నడగాలి? ఎలుక మంత్రి : ఉడత నడిగితే తెలుస్తుంది మహారాజా!!

	ఒక భటుడు : మంత్రులందరూ పగలూ రేయనక నిద్రపోతున్నారే? ఇంకో భటుడు : యువరాజుల వారికి స్వప్నంలో ఒక సుందరి కనిపించిందట! ఆ స్వప్న సుందర్ని కనిపెట్టి తీసుకురావలసిందిగా మహారాజాజ్ఞ!! మంత్రులు ఆపని మీదున్నారు!!

పుల్లయ్య : వర్షంలో తడిసి, గంగా స్నానం చేసొచ్చానని బొంకు తున్నావే? ఎల్లయ్య : వర్షంలో తడిసింది నిజమే ! ఐతే ఆ వర్షాన్ని కురిసిన మేఘాలు, కాశీ నుంచి వచ్చాయి! పుల్లయ్య : కాశీ మేఘాలైతే మాత్రం, అవి కురిస్తే వర్షం, గంగా జలం, ఎలా ఔతుంది? ఎల్లయ్య : గంగా జలం ఆవిరై పుట్టిన, మేఘాలు అవి!

	రాక్షసుడు - 1,2 : నువ్వు చెప్పబోయేది దేవ రహస్యమా? ఐతే వెంటనే చెప్పు! ఊరంతా చాటింపు వేసి, మూల మూలలా, వాడ వాడలా, అందరికీ తెలియచెప్పేస్తాం!!

భేతాళుడు : నేనడిగే ప్రతి ప్రశ్నకి సమాధానం చెప్పి, నీ తల వెయ్యి ముక్కలు గాకుండా తప్పించుకుంటావ్... ఎలా విక్రమాదిత్యా? విక్రమాదిత్యుడు : నేను "చందమామ" చదువుతాను!!